1500 bilar køyrer Fløvegen dagleg, sa Statens Vegvesen i 2017 då dei avslo bygging av nytt fjøs på Flø fordi det var for trafikkfarleg. Likevel valte kommunestyret 21.2.2019 å gå inn for at Flø skal bli turistfyrtårn. Dette vil gje meir eksponering av Fløbygda og trafikkauke langs Fløvegen. Vegen vert ikkje utbetra, det ligg ingen midlar til Fløvegen i investeringsprogrammet for fylkesvegar i perioden 2019 til 2027.
Vi meiner at trafikkbelastinga alt i dag er for høg i Fløvegen, og ei trafikkauke vil vere direkte farleg. Vegen er skuleveg for 100 born mellom Flø og Reiten, han er smal og uoversiktleg, og manglar gang og sykkelveg i lange strekk. Mange born kan ikkje sykle til skulen eller i nabolaget, og ei rekkje ulykker og nestenulykker har hendt.
Innbyggarane langs Fløvegen har ikkje vore involverte i prosessen med utarbeiding av dette strateginotatet som er ein forstudie til reiselivsplan. Dette bryt med intensjonane i plan og bygningslova.
Vi ber Ulstein kommunestyre om å gjere om på vedtaket om å gjere Flø til turistfyrtårn og greie ut konsekvensane av auka turisme.
Vi ber også Ulstein kommune om å involvere dei bebuarane vedtak går ut over i framtidige prosessar.